Реми против Шкупи во Велес (1-1)

Работнички ремизираше против Шкупи, играјќи 1-1 на Градскиот стадион во Велес, во рамките на 21.коло од Првата фудбалска лига на Македонија. Поради влошената безбедносна ситуација во Скопје, со одлука на ФФМ, а по препорака на МВР, Работнички мораше да биде домаќин на друг стадион.

Во првото полувреме и двете екипи повеќе внимаваа на својот гол, а Работнички иако имаше повеќе од играта, не успеа да постигне погодок. Бојан Најденов се обиде да го загрози Зендели од слободен удар, но голманот на Шкупи го одбрани неговиот удар.

Во вториот дел, Шкупи го отвори резултатот. Во 63.минута, Бајрами испрати центаршут од левата страна, Ардијан Нухији беше осамен во шеснаесетникот на Работнички и со удар со глава од 5-6 метри успеа да го совлада Божиновски.

Но, Работнички успеа да се врати резултатски во 75.минута. Херера изведе слободен удар, шутираше кон голот на Шкупи, Зендели кусо ја одби топката, а на неа натрча Душко Трајчевски и ја смести во мрежата. На крајот, двете екипи поделија по еден бод од дуелот одигран во Велес.

ПРВА ЛИГА – 21. КОЛО

РАБОТНИЧКИ – ШКУПИ 1-1 (0-0)

Градски стадион во Велес: Без публика. Главен судија: Марјан Ецкоски. Помошници: Тодоровски и Божиновски (сите од Охрид). Делегат: Борче Мирчески (Тетово). Стрелци: Трајчевски 75’ (Раб), Ар. Нухији 63’ (Шку). Жолт картон: Илиевски (Раб), Јаневски (Шку).

РАБОТНИЧКИ: Божиновски, Силјановски, Илиевски, Марковски, Херера, Петровиќ, Трајчевски, Елмас (68’ Јованоски), Најденов, Сахити, Алтипармаковски.

ШКУПИ: Зендели, Зука (80’ Акгун), Бериша, Јаневски, Лазаревски, Мурати, Асани, Бајрами, Адем (63’ Исени), Нухији (85’ Османи), Петковски.