„Романтична“ дружба на фудбалерите со дечиња од градинката „Лилипут“ (ФОТОГАЛЕРИЈА)

Подготвувајќи се за финалето од Купот на Македонија, на патот кон посакувано освојување на нов трофеј, фудбалерите на нашиот клуб денеска беа домаќини на дечиња од приватната градинка „Лилипут“ од Скопје.

Многу радосни детски срца, искрени насмевки, позитивни вибрации и желби да се дознае барем малку за магијата на фудбалот, почувствуваме денеска во Градскиот парк. Сето тоа благодарение на фудбалерите на Работнички кои издвоија дел од предвидениот тренинг да им подарат радост на најмалите…

„За нас е задоволство што можеме да бидеме домаќини на вака најмили гости, овозможувајќи им барем малку да се запознаат со убавината на фудбалот. Работнички, како еден од најдобрите спортски колективи во Македонија, никогаш не заборава и на својата општествена одговорност, а токму дел од тоа се и ваквите акции како можност да подариме радост на најмалите“ – истакна спортскиот директор на ФК Работнички, Иван Поповски.

А, задоволството од посетата не го криеја и гостите…

„Чест е што сме тука, во клуб со реноме како Работнички. Посебно ни е задоволство што сме тука на само неколку денови пред финалето во Купот на Македонија. Сите од ’Лилипут’ ќе бидеме големи навивачи на Работнички да дојде до уште еден трофеј, затоа што е тим што се сака“ – рече директорката на „Лилипут“, Симона Калајџиска.